ვის მივმართოთ კომუნიკაციებთან დაკავშირებულ საკითხებზე?
მომხმარებელმა ელექტროკომუნიკაციების სფეროში მისი დარღვეული უფლების აღდგენის ან მიყენებული ზარალის ანაზღაურებისათვის საჩივარი უნდა შეიტანოს პროვაიდერი კომპანიის სპეციალურ, საჩივრების განმხილველ სამსახურში, რომელიც ყველა კომპანიას უნდა ჰქონდეს შექმნილი; განცხადებით ასევე შეგიძლიათ მიმართოთ საქართველოს კომუნიკაციების ეროვნულ კომისიასთან მოქმედ მომხმარებელთა ინტერესების საზოგადოებრივი დამცველის სამსახურს ტელეფონის ნომერზე +995 32 2399505, +995 32 2311545, ელექტრონული ფოსტა: defender@gncc.ge. სამსახურის ფუნქციებია:
- მომხმარებელთა განცხადებებისა და საჩივრების განხილვა, მათზე რეაგირების მიზნით ადმინისტრაციული წარმოება;
- მომხმარებლებზე კომისიის სატარიფო და სხვა სახის სარეგულაციო ცვლილებათა გავლენის შედეგების შეფასება, ანალიზი, პროგნოზირება;
- საქართველოს კომუნიკაციების ეროვნულ კომისიაში მომხმარებელთა სახელით გამოვიდეს მხარედ;
- წარმოადგენოს ინდივიდუალური მომხმარებელი მომსახურების მიმწოდებელ ავტორიზებულ ან/და ლიცენზიის მფლობელ კომპანიასთან დავაში;
- მონაწილეობა მიიღოს საკანონმდებლო და აღმასრულებელი ხელიუფლების მიერ იმ ნორმატიული აქტების პროექტების მომზადებაში, რომლებმაც შესაძლოა ზეგავლენა მოახდინოს მომხმარებელთა ინტერესებზე.
ელექტრონული საკომუნიკაციო მომსახურების მიმწოდებელი ვალდებულია უზრუნველყოს:
- საკუთარი აბონენტი უფასო საცნობარო მომსახურებით, მათ შორის, ბილინგის ინფორმაციისა და დავალიანების შესახებ უფასო საინფორმაციო მომსახურებით და შესაბამისი ანგარიშით;
- მომხმარებელისთვის საინფორმაციო კატალოგების მიწოდება საჩივრისა და საპრეტენზიო განცხადების შეტყობინების უფასო ნომრების მითითებით;
- მუდმივმოქმედი 24–საათიანი ცხელი ხაზის მუშაობა;
- საკუთარი აბონენტისათვის უფასოდ ხელმისაწვდომი საგანგებო მომსახურების სატელეფონო ნომრები;
- საჩივრების განხილვისა და მათზე რეაგირების ეფექტიანი შიდა მექანიზმის შექმნა, საჩივრი განიხილოს 15 დღის ვადაში;
- ხელშეკრულებით დადგენილი ხარისხის მომსახურების მომხმარებელისათვის მიწოდება უწყვეტად და შეუფერხებლად ;
- მომსახურების წესისა და პირობების ნებისმიერი ცვლილებების თაობაზე მომხმარებლისათვის არა უგვიანეს 10 სამუშაო დღით ადრე შეტყობინება;
- მოწყობილობის დაზიანების გამო მომსახურების შეზღუდვის შემთხვევაში, ასეთი შეზღუდვის შესახებ მომხმარებლისათვის 3 დღით ადრე შეტყობინება;
- დაზიანების აღმოფხვრისთვის დადგენილი ვადების დაცვა, (დაზიანების სხვადასხვა სახეობისთვის დეტალურად გაწერილია შესაბამისი ვადები, რაც იცვლება 3 სთ-დან 160 საათამდე);
- მოქმედ კანონმდებლობაში განხორციელებული საკანონმდებლო ცვლილებების შესაბამისად ასახვა სააბონენტო ხელშეკრულებებში.
ელექტრონული საკომუნიკაციო მომსახურების მიმწოდებელ კომპანიასა და მომხმარებელს შორის სათანადო წესით გაფორმებული სააბონენტო ხელშეკრულება, დადგენილი სტანდარტების შესაბამისად, უნდა ითვალიწსინებდეს შემდეგ საკითხებს:
- ელექტრონული საკომუნიკაციო მომსახურების მიმწოდებლის დასახელებასა და მისამართს;
- პირობებს მიწოდებული მომსახურების სახის, ხარისხისა და პირველადი ჩართვის ვადის შესახებ;
- მომსახურების მიწოდების შეზღუდვისა და შეწყვეტის პირობებს;
- დაზიანების აღმოფხვრის პირობებს;
- დეტალურ ინფორმაციას მომსახურების ტარიფების, აგრეთვე ცვლილების შემთხვევაში განახლებული ინფორმაციის მიღების შესახებ;
- ხელშეკრულების მოქმედების ვადის, მოქმედების შეწყვეტისა და მოქმედების ვადის გაგრძელების პირობებს;
- ხელშეკრულებით გათვალისწინებული მომსახურების გაწევის ხარისხის დაცვის უზრუნველყოფისა და აღნიშნული ხარისხობრივი მაჩვენებლების დაუცველობის შემთხვევაში გათვალისწინებულ საკომპენსაციო მექანიზმებს;
- მომსახურებასთან დაკავშირებული საჩივრების წარდგენისა და დავის გადაწყვეტის პროცედურას.
საქართველოში ინტერნეტ-კავშირის სიჩქარის გაზომვის ოფიციალურად დადგენილი საშუალება ჯერჯერობით არ არსებობს. თუმცა თქვენი ინტერნეტ-კავშირის შესაფასებლად ეს საიტი შეიძლება გამოიყენოთ, რომელიც ჩვენმა ერთ-ერთმა მომხმარებელმა გვირჩია. ყურადღება! საიტიდან ნურაფერს ჩამოტვირთავთ! უბრალოდ დაელოდეთ, სანამ გამოჩნდება ღილაკი BEGIN TEST და დააჭირეთ მას:
